Sara Dr. Maran Laraw a shiga hpe lakap nna ka ai laika hpe shalai ya ai majaw kabu ai.

Ya yang anhte amyu sha ni kaw nna laika chye, hpaji rawng ai ni KIO Laiza dap kaw maigan shiga sara ni hpe shani shagun English ga hte n hkring n sa Daily News Briefing galaw nna, ndai zawn shingan media a ningmu hpe galai garum la ra ai aten re. Miwa CCTV, China Daily de mung New Light of Myanmar na shiga hpe sha quote galaw nna shiga n'bang na matu, Dehong ginwang, Yunnan de shanhte na reporter ni dat nna live coverage galaw na matu laika sharu bang ga. Laika nmai sa yang CCTV hkan na contact phone ni kaw yawng call volume shalaw matu nna lajin ga.

Raitim, n gun lu hpa gaw Myen amyu sha ni a comments ni hpe analysis hkan galaw yu ai shaloi , "anhte mungdan masha shada majan baw ra hkra, Miwa wanjak company hpe hpa majaw Burmese Army gaw makawp maga ya nga ai", ngu nna mara jaw nga ma ai. Miwa wanjak masing nnga ai Sam, Karen hkan gaw hpa hpe jahpai na nnga tim gasat nga ma ai. Tsun mayu ai gaw shanhte nan gasat mayu ai majaw, jahpyit tam gasat ai lam re hpe media de matut shabra ra nga ai. Law la ai Myen amyu sha ni gaw, anhte a mungdan Miwa ga-up ai lata de du wa ai hpe dum/tsang nga ma ai majaw, ya na zawn gasat ai hpe madi shadaw nga ma ai.

Anhte na media propaganda hpe shagreng sa wa ga. Myen hpyendap ni moral yawm wa hkra, shanhte n tara ai majan hte shang lawm taw ai re hpe anhte hpyendap kata de shabra ra ai, ga shadawn "Burmese Soldier" documentary ni law law DVD hta copy galaw nna, MKA na Myendap ni de shabra ga. Ntara ai majan hte shang lawm nga ai hpyenla wa gaw sinat lashawng gang nna gap dat na myit ung-ang nga ai, nga nna myit hpaji shara ni maram da ma ai. KIA kaw nna Myendap de shabra ai laika ni hpe mungdan kata de nga ai mung shawa hku nna law law jawm shabra ga. Lawu ga de nga ai Myen hpu nau ni, anhte a majan hpe madi shadaw wa na matu mung anhte yawng jawm nna saw shaga ra ai. Anhte gaw tara ai majan hpe gasat nga ai ni re hpe hkum dingdek, law la ai Myen amyu sha ni hpe ladat amyu myu hte sang lang dan ra ai.

Media mung majan langai re majaw, majan pa de laknak lang nna gasat ai zawn atsam strategic galaw nna aten jaw gasat sa wa ga ngu shana mayu ai.

Anhte mung n kung n kyang, chye ai hte gaw ndai media majan hpe gasat nga ga ai. Ra rawng gawng kya ai lam ni mung grai naw nga ga ai. Matut hpaji jaw la marit.

Yawng hpe hkungga let shana ai, -Hkun Htoi Lithkam News & Information Department Mobile:0044 77 155 906 88 Skype: hkunlayang Email:info@kachinland.org www.kachinland.org